ଭୁବନେଶ୍ୱର: ବଦଳିବ ରାଜ୍ୟ ବିଜେପିର ରୂପ। ମାସକମଧ୍ୟରେ ବଡ ଧରଣର ଅଦଳବଦଳ। ଜଣେ ଯୁବ ନେତା ହେବେ ରାଜ୍ୟ ବିଜେପିର ଚେହେରା। ଏନେଇ ବ୍ଲୁପ୍ରିଣ୍ଟ ପ୍ରସ୍ତୁତ କରିଛନ୍ତି ଦିଲ୍ଲୀର ଶୀର୍ଷ ସ୍ତରର ନେତା। ଯାହା କୁହାଯାଉଛି କି ସମ୍ବିତ ପାତ୍ରଙ୍କୁ ଦଳ ଆଗକୁ ଆଣିବା ପାଇଁ ପ୍ରସ୍ତୁତ ହେଉଛି। ଏକପ୍ରକାର ନିଷ୍ପତ୍ତି ହୋଇ ସାରିଛି। ବିଭିନ୍ନ ବର୍ଗର ନେତାଙ୍କ ସହିତ ଘନ ଘନ ବୈଠକ ପରେ ଦଳର ନେତା ଏକପ୍ରକାର ନିର୍ଯ୍ୟାସରେ ପହଞ୍ଚିଛନ୍ତି। ରାଜ୍ୟ ମଙ୍ଗୁଆଳ ବଦଳାଇବା ସହିତ ମୁଖ୍ୟମନ୍ତ୍ରୀ ଚେହେରା ବି ଘୋଷଣା କରିବ ଦଳ। 2024 ପାଇଁ ପୁରା ଖସଡ଼ା ପ୍ରସ୍ତୁତ ହେବ। ଏବେ କେନ୍ଦ୍ରୀୟ ବିଜେପି ନେତାଙ୍କ ଫୋକସରେ ଓଡିଶା। ଜୋରଦାର ଲଢେଇ କରିବାକୁ ରଣନୀତି ଦିଲ୍ଲୀରେ ତିଆରି ହେଉଛି। ସାମ୍ନାକୁ ଆସିବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ତାଙ୍କୁ ଆଗକୁ ଛାଡିବ ଦଳ। ଏପରିକି ସେ ମୁଖ୍ୟମନ୍ତ୍ରୀ ଚେହେରା ବୋଲି ରାଜ୍ୟବାସୀଙ୍କୁ ଏକପ୍ରକାର ବାର୍ତ୍ତା ଯିବ। ଏହାପରେ ଅମିତ ଶାହ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡିଶା ଗସ୍ତରେ ଆସି ସରକାର ଓ ବିଜେଡି ବିରୋଧରେ ଆକ୍ରମଣ ଜାରି ରଖିବେ। ନିୟମିତ ଭାବରେ କେନ୍ଦ୍ରମନ୍ତ୍ରୀ ମାନେ ଆସି ବିଭାଗର ସମୀକ୍ଷା କରିବା ସହିତ ଲୋକଙ୍କ ସହିତ ମିଶିବେ। ଯୋଜନାର ହିତାଧିକାରୀଙ୍କ ସହିତ ଆଲୋଚନା କରି ସରକାର ଙ୍କୁ ଘେରିବେ। ଏଭଳି କିଛି ନକ୍ସା ପ୍ରସ୍ତୁତ କରିଛନ୍ତି କେନ୍ଦ୍ରୀୟ ବିଜେପି ନେତା। ଯଦି ଏହା କାର୍ଯ୍ୟକାରୀ ହୁଏ ତେବେ ଦଳର ମିଶନ 2024 ଏକପ୍ରକାର ସଫଳ ହୋଇପାରେ ବୋଲି ଆଶା କରିଛନ୍ତି ନେତା।
ଏହାରି ଭିତରେ ରାଜ୍ୟ ସଭାପତି, ସମ୍ପାଦକ ରାଷ୍ଟ୍ରୀୟ ଅଧ୍ୟକ୍ଷ ଙ୍କୁ ଭେଟି ଆଲୋଚନା କରିଛନ୍ତି। ସେହିପରି ବିଧାୟକ ଦଳ ମଧ୍ୟ ଭେଟି ପୌର ଓ ପଂଚାୟତ ଫଳ ନେଇ ନେତାଙ୍କ ସହ ଆଲୋଚନା କରିଛନ୍ତି। ଏଥିସହିତ କେଉଁଠି ତ୍ରୁଟି ରହିଲା ସେନେଇ ଆଲୋଚନା ହେବା ସହିତ କିଛି ପ୍ରସ୍ତାବ ଦେଇଛନ୍ତି। ସେପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ଭେଟି ସବୁ କଥା କହିଛନ୍ତି। ଦଳର ଅନ୍ୟ କିଛି ତୁଙ୍ଗ ନେତା ମଧ୍ୟ ମୋଦିଙ୍କୁ ଭେଟିଥିବା ଚର୍ଚ୍ଚା ହେଉଛି।
ସେହିପରି ବିରୋଧୀ ଦଳର ନେତା ମଧ୍ୟ ବଦଳିବେ। ନିକଟରେ ବିଧାୟକ ଦଳ ଟିମ ଦିଲ୍ଲୀ ଯାଇ ଫେରିଛନ୍ତି। ଏଠାରେ ଏକପ୍ରକାର ନିଷ୍ପତ୍ତି ହୋଇସାରିଛି। ବିଷ୍ଣୁ ସେଠୀଙ୍କ ନାଁ ସବୁଠୁ ଆଗରେ ରହିଥିବା ବେଳେ ଜୟନରାୟନ ମିଶ୍ର ମଧ୍ୟ ଦୌଡ଼ରେ ରହିଛନ୍ତି। ଦଳରେ ପୁରା ଅମୂଳ ଚୁଳ ପରିବର୍ତ୍ତନ ନେଇ ଆଲୋଚନା ହୋଇଛି।
